الكلمة حياة أو هلاك ،،
ما تخدعش نفسك بالقوة…
إحنا كلنا أضعف مما بنتصور،
وكل اللي بنيته في حياتك ممكن يقف في ثانية… على كلمة واحدة…
كلمة توقف نزيف روحك من غير ما تلمسك.
كلمة تفكك من سجن إنت اللي بنيته حواليك.
كلمة ترجّعلك نفسك بعد ما كنت فاكرها راحت.
كلمة ترجّعلك ثقتك اللي اختفت من حياتك.
كلمة ترجّعك من حافة الانهيار لنور الحياة.
إنها ( الكلمة )يا ساده :
مش مهم مين يقولها،
ولا إمتى تتقال،
المهم إنها توصل قبل ما يتكسر جواك شيء ما يتصلحش أبداً… مهما كان.
كلنا، مهما وصلنا أو علينا، في يوم بنقف قدام المراية ونعترف:
“كنت على وشك السقوط… لولا كلمة أنقذتني.”
الكلمه سر الحياه ،،
كلمة كنت مستنيها… كلمة رجعتني للحياة… كلمة رجعتلي الأمل.
ويمكن الكلمة ما تجيش من حد،
وساعتها لازم تقولها لنفسك حتى لو صوتك بيرتعش، حتى لو ضعيف…
إفتكر إنك أقوى من أي وجع.
لأن الكلمة دي هي الفرق بين إنك تموت وإنت واقف… أو تتولد من جديد…
خد بالك…
الكلمة مش رفاهية ولا لعبة.
الكلمة قوة حقيقية.
ممكن تبني إنسان من رماده،
وممكن تقتل روح وهي لسه بتتنفس.
هي زي الرصاصة في قوتها وتأثيرها،
لو خرجت مفيش رجوع،
إمّا تكون رحمة،
أو خنجر يسيب أثر ما يمحيهوش الزمن… مهما حاولت تغير التصويب.
يمكن كلمة ترجعلك ثقتك في نفسك،
بعد ما ناس كتير حاولوا يقللوا ثقتك دي ،،،
يمكن كلمة حلوة في لحظة ضعف تمسح سنين وجع كبير…
يمكن كلمة في أقسى لحظة تبقى النفس اللي تعيش عليه العمر كله…
علشان كده…
احفظ لسانك.
اختار كلماتك زي ما تختار طريق عمرك.
خليها نور يفتح أبواب أمل،
خليها كلمة تلهم وتشجع وقت الشدة والخذلان…
وإوعى تطلقها رصاصة تجرح وتفضل تلاحقك طول عمرك…
افتكر دايمًا:
الكلام سهل… والفعل والعمل أصعب.
لكن التاريخ ما بيكتبش أسماء المتفرجين.
التاريخ بيفتكر اللي قال الكلمة اللي أنقذت روح،
وجبرت خاطر،،
ورسمت ضحكة على وش مقهور،،
وفرحت إنسان بعد تعب سنين،،
وأديت امل كنت حاسس انه هو مات،،
انها الكلمه الطيبه يا ساده:
واللي تحرك ساعة ما الكل اختار يسكت.
التاريخ ما بيكرمش اللي قعد يتفرج أو علق من بعيد،
لكن بيرفع اللي امتلك شجاعة يعمل اللي غيره خاف يعمله،،،
واللي أطلق كلمة تبني وتحيي وتجبر وتدي امل وتسامح …
بينما غيره اكتفى بالمشاهدة.
في زمن الصمت… كلمة واحدة هي الفرق بين إنك تسيب أثر، أو تتحول لظل ما لوش تاريخ …
أحيانًا كلمة واحدة أغلى من عمر كامل،
وأحيانا سكوتك جريمة تساوي موت بطيء لروح حوالينا…
اختار دايمًا تكون أنت صاحب الكلمة اللي تحيي… مش الصمت اللي يقتل..
