استعاد المخرج محمد سامي ذكرياته مع تامر حسني، خاصة أنهما تجمعهما علاقة صداقة قوية وتعاونا أكثر من مرة.
ونشر سامي صورة تجمعه بتامر حسني عبر حسابه بموقع انستجرام، وعلق قائلا : وَلَا تَنْسَوُا الْفَضْلَ بَيْنَكُمْ، وأنا قاعد إمبارح في التصوير افتكرت الرحلة والشقى والتعب من أول عمل لحد العمل اللي بصوره دلوقتي، وافتكرت صعوبة الحصول على فرصة عشان الواحد يثبت نفسة و يحقق أحلامه.
وتابع : طبعا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي، تامر قدملي كل الدعم والحب والإمكانيات اللي خلتني أثبت نفسي، وبالذات في وقت كان صعب الشباب ياخد في الدرامة فرصة بحجم مسلسل آدم.
وأضاف محمد سامي : فاكر إن الكل كان رافض إني أخد الفرصة دي ومستكبرينها عليا، إلا هو وقف في ظهري كأنه بيحارب لأخوه و بصلي مرة والظروف كلها ضدي، وكنت حاسس وأنا بحضر إنهم هيجيبو حد غيري، وقاللي ده مسلسلك وهتعمله وهتنجح وهتنجحنا معاك.
واستكمل : حتى طريقته المتواضعة وهو بيقوللي مسلسلك، كأني عامل تسع مسلسلات قبله تحسس الواحد بنفسه وأهميته، أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر.
